كلمة بحبك وطابور العيش!

جلست ام هشام تروى لى معاناتها اليومية فى طابور العيش , قالت: تعرفى يا ابلة فادية اصل انا مش ناقصة ,لكن انا عارفة انى طول عمرى قليلة البخت ..... وانسابت دموعها.

وام هشام شابة مصرية اصيلة بكل معنى الكلمة , تزوجت من شاب زى الورد والعهدة عليها فى الرواية, ولكن بكل اسف وبعد فترة من زواجهما بدأ يتعب اكثر واكتشفوا اصابته بفيروس الكبد وهذا ما جعله على حد قولها, يعمل يوم ويرقد عشرة, ونزلت ام هشام لتعمل فى البيوت عند الناس الطيبين ,...

والان لم تعد قادرة على الحصول على رغيف الخبز الا بعد مناهدة طويلة امام الافران , وهذا ما لا تجد له وقت لانه يعطلها عن شغلها واكل عيشها ؟

وقالت لى: تعرفى يا ابلة فيه ناس ولاد حرام بيقولولى اسيبنى من الراجل ده واتطلق واشوف حالى , ويعلم الله انه فى صحته ماكانش حارمنى من حاجة , كان جايب لى الحلو كله , اقوم اسيبه فى شدته , طب اروح من ربنا فين .....

وسمعت صوت التليفون لاجد احدى قريباتى على الخط , باكية وهى تقول : انا خلاص تعبت الراجل ده زهقنى , لابيقول ليه كلمة حلوة , ولا عمره دخل على بهدية زى خلق ربنا ولا حتى سفرنى اصيف فى الاماكن التى نسمع عنها , دى مبقتش عيشة ...

    وقلت لها: تعرفى تقولى الحمد لله , تعرفى تشعرى انك فى نعمة ..

زوجك مثل معظم الرجال تربى فى بيئة لا تجيد كلمات الحب المنمقة , لكنه يبذل ما فى وسعه لاسعادكم , وصدقينى تجمعكم كأسرة فى صحة وستر نعمة وفضل من الله ...ودعك من تفاهات الفسح والهدايا فهى لا تحقق السعادة الحقيقية , وحكيت لها معاناة ام هشام وكيف انها جميلة وشابة لكنها صابرة مقدرة لزوجها فى مرضه ..

  وهدأت قريبتى وحمدت الله عز وجل ,  وبعد قليل دخل زوجى من عمله وبدأت احكى له واحلل ظواهر المجتمع , والعن الحكومة التى لاتكفل المرضى الفقراء ولا حتى توفر رغيف الخبز بغير اهانة , وتسألت لماذا لا يكلف الزوج نفسه كلمة حب رقيقة تسعد قلب زوجته ,

    وقبل ان افلسف الامور كعادتى!! قال لى زوجى : فادية عامله لنا ايه على الغداء؟

         وقلت محشى .......................يا حبيبى ..

   ولكم منى كل الحب

        فادية

محشي00

بالهنا والشفا00
ب 4 جنيه الارز00
وعلبه السمنه الهولندي ب20 جنيه00
والقوطه 3جنيه00
00ربنا يدميها نعمه
00وتحيا الحكومه
00
المرتبات عاليه
مفيش طوابير عيش
المواصلات مريحه00
الشوراع 00مش ز حمه
والطرق والكباري00منسابه
والمستشفيات00تعالج المرضي مجانا
والتعليم00ببلاش
والثانويه العامه00مفيش مشاكل
والجامعات00اخر حلاوه
والعدل00سمتنا
والاخلاق00منهجنا
00صباح الخير/ياست الكل
00
تحياتى

حرّر بواسطة rodhawp في الخميس 20 مارس 2008 عند 01:12 ص

rodhawp

-

07:19 ص

-

الثلاثاء 18 مارس 2008

---

أين بقية الحوار ؟

يا ابله يا ابله

حضرتك اتكلمتى عن الرجل الشرقى (اللى ينشك فى لسانه ) ومشس بتعرف يقول .

كنت منتظر باقى الحوار ..لان كونك قولتى حبيبى لا يعنى لنا شىء

وكم كنت اتمنى ان تقولى
حمل الزهور اليا كيف ارده ُ ... وصباى مرسوم على كتفيه

Anonymous

-

07:10 م

-

الأربعاء 19 مارس 2008

---

احنا تعبنا حكومتنا الرشيدة قوى

استاذنا الفاضل محمد

الحكومة تعبت معانا

واصحاب المعالى والسمو خلاص زهقوا

وعلى راى مارى انطونيت

مش لاقيين العيش خليهم يأكلوا جاتوه

ولك دائما كل التقدير

فادية

fadiabatisha

-

08:57 م

-

الأربعاء 19 مارس 2008

---

لم افهم التعليق بكل اسف

اخى الفاضل

لم افهم المطلوب بالتحديد

كل الكلام الحلو الذى يحبه البشر ( رجل كان او امرأة )

ينبغى علينا ان نقوله لازواجنا ويقوله كل زوج لزوجته

وهذا ما اتمناه من كل انسان

ان يكون كل كلامه حلو يحبب اليه كل الخلق

ولك كل الشكر

فادية

fadiabatisha

-

09:01 م

-

الأربعاء 19 مارس 2008

---

لا وقت للحب

الناس مش فاضية للحب
احنا في حالة حرب
نشد الحزام شوية في الاكل و الحب كمان
لغاية ما ربنا يسهلها و ننتصر علي عدو الفقر و الغلاء
تحياتي

masryeen

-

10:18 م

-

الأربعاء 14 مايو 2008

---

طب نحليها شوية

اخى محمود

الناس حلتها صعبه الغلاء المدارس الامراض

لكن ما رأيك ان نضيف الى الحياة شوية تحليه

ان نفتح قلوبنا لكلمات الحب التى تبهج كل انسانة على وجه الارض

مش لازم تكون ضلمة من كله

يعنى كلمة حلوة من الزوج وتقدير وابتسامة من الزوجة

تحلى الايام شوية

ولك كل الشكر

فادية

fadiabatisha

-

10:59 م

-

الأربعاء 14 مايو 2008

---

أرسل تعليق
من:	*  عضو مسجل: [ دخول / التسجيل ]
* عنوان الموقع:
* البريد الإلكتروني:
الموضوع:
* النص:
* الرمز:

multifunction machine