هو هيتجوز عليها وهى هتخلعه....عادى

اوعى حد يزعل من الكلام , اصل الايام دى مش عارفة ليه البعض يحاول ان يجعل مجتمعنا يقبل فكرة التعدد, وللعلم المجتمع المصرى تاريخياً من المعروف انه لايقبل فكرة اكثر من زوجة لرجل واحد.

    وقبل ان يهاجمنى البعض قائلاً الاسلام يجيز التعدد , سأجيبه قائلة: تعرف حاجة اسمها الضب؟؟؟

    سأقول لكم ..الضب عبارة عن حيوان صغير من الزواحف ,اقرب ما يكون الى البرص

    وعندما تم  تقديمه  الى النبى صلى الله عليه وسلم ,ولم يمد الرسول يده إليه ليأكله

    سأله الصحابة :هل اكله حرام؟

      وقال لهم النبى بما معناه انه اشمئز منه لانه لم يتعود عليه من قبل..

    قد يقول احدكم وما دخل الضب بالتعدد

      ببساطة اكل الضب حلال ... وبرغم ذلك رفضه النبى الكريم

    والتعدد حلال .... وعادى ان ترفضه من شاءت

    احمد عز( مش الممثل لا ده اللى بيمثل علينا وخد لنفسه حديد مصر ) بيقولوا متجوز اربعة.......عادى

      بعض شيوخ الفضائيات , محمد حسان, محمد حسين يعقوب, ابو اسحاق الحوينى

    متزوجون اكثر من واحدة...........عادى

     هؤلاء مليونيرات وبفلوسهم ......   ولكن مجتمعنا المطحون فيه النساء والرجال

   والاسر التعبانة فى تربية وتعليم ابنائها..... كيف تتحمل فكرة التعدد

     والحال زى ماكلنا عايشينه صعب قوى

  وتعالوا نشوف الحكاية ايه؟؟؟

, نظر الرجل من وراء نظارته الى زوجته ,وابعد الجريدة من يده وقال ... ازمة العنوسة مضايقانى قوى ....بفكر اساعد فى الحل

   وفرحت الزوجة , وقالت له يارب يا خويا , ده حتى يبقى ثوابك عند ربنا كبير

     ... لكن إلا يا خويا هتعمل ايه؟

   وقال الرجل بجدية وتضحية نويت اتجوز؟!!!

     يالهوىىىىىىىىىىىىىىىىىىىىىىىىىىىىىىىى

   كانت هذه صرخة الزوجة , وبعد ان هدأت قالت: ياراجل الواد ابنك فى الجامعة والبت  فى الثانوية , واخر العنقود فى سنة خامسة.

 بقى  بدال متقولى احسن دخلى , هو عشان انا مبتكلمش , ده انا صابرة وساكته على الغلب.

  ونظر اليها زوجها متنمراً وقال بشخطة ...

    انت ناقصك حاجة؟

   قالت ده انا ناقصنى كل حاجة , ثم اللى تتجوزك دى تتجوزك ليه , ده انت ماشى بالعافية والضغط مغلبك, والسكر خايفين لتجيلك غيبوبة تقضى عليك.

    وصمت الرجل ............

     وقال لها يا شيخة ده أنا كنت بهذر معاكى .....................................

   ودائما لكم منى كل الحب

     فادية

تعدد الازوجات

بصراحة انا واحدة من الناس مقبلش جوزي يتجوز عليا انا عرفة ان ربنا محللة اربعة بس انا ممكن اكون اربعة زوجات في بعض ومخليهوش يتجوز عليا

ss1987

-

06:16 م

-

الخميس 12 يونيو 2008

---

الزوجة التانية وحل مشكلة العنوسة

والله يافادية كل اللي بيتكلموا من الرجالة على حل مشكلة العنوسة واحياء سنة النبي .والله لايهمهم العنوسة ولاسنة النبي
ده لف ودوران كل ده بحث عن متعة زائلة
الراجل اللي ببتكلمي عليه واضح ان سنه كبير وصاحب عيا
وعاوز قال يحل مشكلة العنوسة والنبي يحل مشكلته هوا الاول ويعالج نفسه عشان يملا عين مراته الاولانية بدل مايجيب واحدة صغيرة يقهرها جنبه
على فكرة ماحدش واخد باله من حاجة مهمة اوي
لو كان قلبهم على الاسلام والمجتمع وعاوزين يحلوا مشاكله ماشفناش راجل لما يجي يساعد المجتمع يقوم يدور مثلا على ارملة بتربي ايتام ولا مطلقة مظلومة وحيدة صاحبة عيال يساعدها ويشيل ههمهم
ده الاسلام بقا انك تساعد غيرك
انما كلهم بيساعدوا المجتمع بانهم يدوروا على المذذ
ههههههههه
الله يخرب بيت كده هما هايفوقوا امته بقا ماهم مفقوسين

ameera1977

-

06:23 م

-

الخميس 12 يونيو 2008

---

موضوع جدا رائع

مرحب أخت فادية ..
بصراحة موضوعك جدا رائع ... وحلو إنه ينطرح ونناقشه ..
ومثل مالاحظت إن التعليقات كانت من قبل النساء فقط ..
حيث أن الشخص اللي يحس نفسه ضحيه لهذا الموضوع هو النساء ..

بصراحة .. وبالرغم من أني أحد الرجال ... والمعروف دائما بأن الرجال مؤيدون لهذه الفكرة .. إلا أني أعارضها وبشدة ..

أتعرفين لماذا .؟؟؟

أول شي ..لأن الرجال لما يفكر إنه يتزوج .. ويختار شريكة حياته .. لازم يعرف إنه لما يختارها ... لازم يحافظ عليها ويحميها ويرعاها .. والأهم من كل هذا لازم مايجرحها ..
وأنا أعرف إن التزوج من إمرأة ثانية هو عبارة عن جرح لمشاعر الزوجة الأولى ..وليس أي جرح .. إنه جرح عميق يصعب أن يزول أثره مع الأيام .. بالإضافة إلى أن المرأة من وجهة نظري .. هي إنسانة تحمل أرقى أنواع المشاعر الجياشة والحب والحنان ... فهي بدورها تكمل الرجل وتعطيه كل شي ..فلماذا بعد كل العمر اللي تعيشه معاه وتتعب بتربية الأولاد .. وتشقى مثل مالرجال يشقى ويتعب ...يروح الرجال وبكل فضاضة ينسى كل هالشي وينكر كل شي ويروح يجرحها ؟؟؟

بصراحة ... أنا إنسان إذا فكرت أرتبط بإمرأة ... فلن أحاول في يوم من الأيام جرح وكسر قلبها المسكين ...
فهي ستكون ملكة عندي ولن أخذلها ولن أهينها أبدا ...
فهي تملك مشاعر أكثر من المشاعر التي يملكها الرجال ..
فهي نور البيت .. ويجب علينا نحافظ على هذا النور .. ونمنع إنطفائه ...

إلا لو كانت مثلا هناك عيوب في العشرة الزوجية بين الطرفين .. وكانت هناك أسباب واضحة لأن يتزوج الرجل بإمرأة ثانية .. فأنا أقول إنه عادي لو تزوج .. لأن الرجل أيضا يحب الحياة مثل ما المرأة تحب الحياة ..

ولازم كل شخص يعيش حياته بشكل طبيعي ..

أشكرج مرة ثانية على طرحج لهذا الموضوع الشيق ..

تحياتي لك
الرجل النبيل ( حليف المرأة )

arabianman

-

07:22 م

-

الخميس 12 يونيو 2008

---

جزاكى الله خيرا

فهلا موضوع رائع وتعيقات اكثر من رائعة فعلا المرأة حساسة جدا لو زوجها تزوج عليها انا وجهة نظرى ان الرجل ممكن يتزوج مرة اخرى لكن بشرط اذا كانت زوجته مثلا لا تنجب يعنى المال والبنون زينة الحياة الدنيا على الرغم من ان الزوجة لو كان زوجها لا ينجب ما بتطلبش انها تسيب زوجها لانها بتكون بتحبه وحب حقيقى لكن للاسف الزوج بيستخدم كلام ربنا على كيفه لانه لن يستطيع ان يعدل بين زوجاته طبيعى لان المشاعر دى شىء خارج عن ارادته . تحياتى

popan

-

07:48 م

-

الخميس 12 يونيو 2008

---

أحيانا يصلح ذلك الحل!!

عبرتى عن كلامك بأستشهاد بموقف جميل جدا و مقنع جدا لمن يريد أن يفهم وجهة نظرك.. بجد أبدعتى جدا فى أختيار ذلك الموقف مع اشرف الخلق صلى الله عليه وسلم...

و إن كنت أتفق معكى تقريبا فى كل كلامك..

و برضو ماعرفش الكلام إللى حكتبه دلوقتى أنا بقوله علشان ماتجوزتش لسه و ماعرفش الشعور بيبقى عامل إزاى..

بس أنا بحس أنى لو لقيت نفسى فى يوم من الأيام.. مقصره فى حق زوجى الحبيب.. و مش قادره ابقى أهل له.. أو لم يمن عليا الله بنعمه الإنجاب..

سأكون أول واحده تقول له أن يذهب ليتزوج..

قد يرفض أو يوافق..

و لكنى إن لم افعل ذلك سأشعر بعقده ذنب طوال حياتى..

أنا عارفه أن هو لازم يستحملنى لأنه أرتضا بيا كده من الأول.. و لو عكسنا المواقف عمرى ما حفكر أنى أتجوز واحد تانى غيره.. بس أنا بتكلم من وجهة نظرى أنا.. و ماعرفش هو رأيه إيه..أنا لو ماطلبتش منه أنه يتجوز حموت من كتر شعورى بالذنب..

كمان فى حاجه ممكن ناس كتير تستغربها..

أنا لو حسيت أنه بجد مش لاقى سعادته معايا.. و انا لأنى بحبه جدا لاقيه سعادتى فى مجرد وجودى جمبه حتى و إن لم يكن هو معى بكل جوارحه.. لن ارفض فكره زواجه من أخرى ليعيش تلك السعاده التى يتمناها.. و أنا سأرضى أن أكون زوجه ثانيه يعيش معها لمجرد أنى لن أتقبل فكره أن أعيش و انا بعيده عنه..

ممكن تقولى عليا.. هبله .. عبيطه..

بس أنا بحبه.. و مش حقدر أتخيل أننا نفترق.. فأحسن لى أبقى معاه و هو بنص قلبه و قلبى أنا كله معاه.. أحسن من أنى أخسره للأبد..

omniaatta

-

01:57 ص

-

الجمعة 13 يونيو 2008

---

يا سمورة ما شاء الله عليكى

سمر الجميلة

صدقينى يا سمر لا اعتقد ان من يتزوجك ممكن يفكر فى اخرى

فأنت ما شاء الله عليكى من اجمل واطيب وارقى البنات

وربنا يرزقك بمن يقدرك ويحبك ويشيلك فى عينيه

ولك يا حبيبتى كل التحية

فادية

fadiabatisha

-

12:50 م

-

الجمعة 13 يونيو 2008

---

والله يا اميرة لك حق

الغالية اميرة

عارفة يا اميرة انا احترم جداً الرجل الذى يصرح قائلاً

( ربنا حلل التعدد وانا رجل اريد اكثر من امرأة)

اما التحجج بالعنوسة, وإدعاء انا سنة , وانهم بذلك يسعون لتطبيق الدين فهذا ما يجعلنى لا احترم هذه العقول

وكعادتى يا اميرة احبك واحترم ارائك وسعيدة جداً ان رزقنى الله صديقة رائعة مثلك.

ولك دائما كل التحية

فادية

fadiabatisha

-

12:53 م

-

الجمعة 13 يونيو 2008

---

تعرف انت فعلا رجلاً نبيلاً

اخى الفاضل الرجل النبيل

حليف المرأة, ومن هى المرأة اليست الام والاخت والزوجة الحبيبة والابنة

انك رجل صادق مع نفسك وادعو الله ان يرزقك بمن تسعدك وتسعدها

وتعيشان معاً احلى قصة حب

ولك دائما كل التحية

فادية

fadiabatisha

-

12:57 م

-

الجمعة 13 يونيو 2008

---

يا هبة الحياة ليست كاملة

اختى الحبيبة هبة

بعد انت قلتى ان الرجل من حقه ان يتزوج فى حالة عدم انجاب الزوجة

قلتى بعدها برغم ان المرأة لا تطلب ترك زوجها نه لاينجب

اننى ارى ان الرجل الذى يرزقه الله زوجة صالحة محبة وهو سعيد معها

يجب ان يحمد الله حتى لو كانت لا تنجب

ويرضى بتلك القسمة من الله

اما محاولة الجمع بين كل الاشياء لن تصل به الى السعادة ابداً

وتحيتى اليك دائما يا هبة

فادية

fadiabatisha

-

01:03 م

-

الجمعة 13 يونيو 2008

---

عافاك الله من هذه المرارة

حبيبتى الغالية امنية

ناقشتك من قبل فى فكرتك

واحترم رأيك تماماً , ولكن من يبحث عن كل الاشياء يفقد كل شىء

وادعو الله ان يرزقك بالخير كله وان يجعلك مع احمد من اسعد خلقه

ولك حبيبتى كل التحية

فادية

fadiabatisha

-

01:05 م

-

الجمعة 13 يونيو 2008

---

انوثه

اختي فاديه حبيت اعلق على الموضوع لانه اصبح ظاهره الزواج اكثر من واحده واعتقادي ان بعض القنوات الدينيه تشجع عليه بطريقه غير مباشره واقول ان الاسلام اباح التعدد ولكنه قيده بشروط ..ايضاّان التعدد ايام الرساله كان يعتبر تقييد انت تعلمين ان الرجل فى الجاهليه كانت له عشرات النساء والاسلام قيد التعدد ولكن فهمنا ان التعدد هو ترفيه ..كان الله في عون نسائنا واتمني ان يزيد عقل رجالنا ليبحثو عن مرأه المضمون لا الجسد تحياتي اختي الفاضله

Anonymous

-

11:44 م

-

الجمعة 13 يونيو 2008

---

ولك كل التقدير يا انوثة

اختى الحبيبة انوثة

كان الله فى عون النساء

فالمرأة المطلوب منها ان تكون فى جمال مارلين مونرو

وفى رقة مريم فخر الدين زمان وفى خفة سعاد حسنى

وفى ذكاءمدام كورى وفى طهر السيدة مريم

ومطلوب منها ان توافق على ان يتزوج زوجها عليها

بل والمفروض كما يصورن ان تحب تلك الضرة ويدعون انها اختها ويجب ان تحب لها الخير

وإذا قالت المرأة لا

فهى فى ظنهم غير قوية الايمان

وذكرنى هذا بموقف صديقة لاختى ايام مأساة البوسنة

نظر زوجها الى التليفزيون متحسراً , وقال : يجب ان تسمح لنا زوجاتنا بالزواج من هؤلاء النسوة المسكينات

وقالت زوجته المعروفة بهدوئها الرصين

تعرف فلانة( وهى جارة لهم ارملة ولكنها غير جميلة)

انا اسمح لك بزواجها والجار اولى

فنظر لها زوجها غاضباً وقال:

انسى موضوع الزواج التانى خالص

وقالت هى: ما كان من الاول؟

وهى كلمة اقولها لكل من يريد الزواج

روح اتجوز لكن بلاش تماحيك فارغة من فضلك؟!

ولك كل الحب والتحية

فادية

حرّر بواسطة fadiabatisha في السبت 14 يونيو 2008 عند 01:24 ص

fadiabatisha

-

12:22 ص

-

السبت 14 يونيو 2008

---

أرسل تعليق
من:	*  عضو مسجل: [ دخول / التسجيل ]
* عنوان الموقع:
* البريد الإلكتروني:
الموضوع:
* النص:
* الرمز:

multifunction machine